I vodhën shtëpinë, Ribery konfirmon vendimin e tij për të ardhmen

Franck Ribery e ka marrë veten pas vjedhjes së shtëpisë së tij në Firence. Miku i tij, ish-portieri francez i Fiorentinës, Sebastian Frey, i cili në një lidhje direkte me një emision sportiv, deklaroi se kishte folur me Ribery dhe se ishte i bindur që nuk do të linte Firencen edhe pas asaj që ndodhi.

“Sensacioni i parë pas një rasti të tillë është të largohesh sa më parë dhe të sigurosh familjen, por kam folur me Ribery dhe jam i sigurt që ai nuk dëshiron të largohet nga Fiore e aq më pak të merret me qytetarët atje. Jam i sigurt që do të zbresë në fushë me të njëjtën grintë e dëshirë si më parë, për të nderuar fanellën”, deklaroi Frey.

I menjëhershëm ishte edhe reagimi i vetë Ribery, që konfirmoi besnikërinë ndaj klubit dhe tha se ka firmosur për skuadrën violë e do të vijojë të bëjë maksimumin në fushë për fanellën e Fiorentinës.

“Vëllai im shumë faleminderit për fjalët. Ti më njeh, e di prej nga vij dhe nuk jam nga ata që bëjnë hapa pas. Kam thënë po dhe atë që them, e bëj. Nuk mund t’u pëlqejë të gjithëve, por kam pas vetes mbështetësit e vërtetë të një klubi dhe një qytet të tërë që beson te unë, ndaj të tjerat nuk kanë rëndësi. Kam firmosur për violën. Violë përgjithmonë”, shkroi Ribery.