Igli Tare riformaton Milanin e Allegrit, 6 lojtarë me “valixhet” gati

Java që ka nisur sot pritet të jetë vendimtare për merkaton e Milanit, sidomos për sa i përket largimeve që do të hapin rrugën për afrime të reja. Drejtori i ri sportiv Igli Tare është në punë për të gjeneruar të ardhura që do të riinvestohen për t’i dhuruar Massimiliano Allegrit përforcimet e kërkuara.

Transferimi i Theo Hernandez te Al Hilal është në fazat përfundimtare. Francezi do të kalojë në klubin e Simone Inzaghit për 25 milionë euro, duke përfituar një pagë prej 18.5 milionë në sezon plus bonuse. Ai largohet pas 6 sezonesh te Milani, me 262 ndeshje, 34 gola dhe dy trofe në vitrinë.

Edhe Ismael Bennacer nuk është grumbulluar me skuadrën dhe është drejt largimit, me Fiorentinën e Piolit që ka shfaqur interes. Adli, i rikthyer nga huazimi te Fiorentina, është gjithashtu në dalje me mundësi transferimi në Sassuolo, Katar ose Rusi.

Transferimi i Alvaro Moratës te Como është gati, por pritet vetëm që Galatasaray të pranojë largimin e sulmuesit. Klubi turk kërkon 3 milionë euro si kompensim. Malick Thiaw është objektiv i Newcastle në Premier League dhe i Como-s, që ka arritur marrëveshje me lojtarin. Milani kërkon 25-30 milionë euro për të. Musah, ndërkohë, ka oferta nga Anglia, pas ndërprerjes së negociatave me Napolin.