Immobile: Vazhdojmë ëndrrën, dua të thyejë rekordin e Higuain

Emergjenca koronavirus ka ndalur kampionatin, por Ciro Immobile është mëse i karikuar për rifillimin nëse kjo gjë do të ndodhë. Sulmuesi rekordmen i këtij sezoni, shfaqet shumë optimistë.

“Kur të afrohet momenti për tu kthyer në fushë duhet të jemi të aftë të përgatitemi mentalisht sepse janë 12 ndeshje shumë të rëndësishme për të vazhduar ëndrrën tonë. Objektivat tonë nuk ndryshojnë. Rekordi i golave në një kampionat të vetëm i arritur nga Higuain në 2016? Do të provoj ta thyej.

Sulmuesi i njohur ka shënuar 27 gola në 26 ndeshje dhe duhet të shënojë edhe 9 në 12 ndeshjet e mbetura për të barazuar 36 golat e Higuain me Napolin. Duhet theksuar se deri tani Immobile ka shënuar 10 herë nga pika e bardhë, ndërsa në vitin e rekordit argjentinasi shënoi vetëm 3 me penallti gjithë kampionatin.

“Po stërvitem shumë për ta arritur këtë objektiv, çdokush ka një të vetin personal. Do ishte e bukur, si veza e Pashkës: të shohim cila do të jetë surpriza kur të kthehemi në fushë”, tha sulmuesi italian.