Inter arrin akordin me Al-Hilal për Cancelon, mbrojtësi merr kohë për reflektim

Hidhen hapa konkretë në boshtin Milano–Riad. Sipas burimeve të Sky Sport, Inter dhe Al-Hilal kanë arritur një marrëveshje verbale për rikthimin e mundshëm të João Cancelo-s te zikaltërit, duke hapur rrugën për një operacion që tani varet vetëm nga vendimi përfundimtar i lojtarit.

Në orët e fundit kontaktet me Jorge Mendes, agjentin e mbrojtësit portugez, kanë qenë të vazhdueshme. Megjithatë, Cancelo ka kërkuar një ose dy ditë kohë për të reflektuar, pasi prioriteti i tij mbetet Barcelona. Klubi katalanas ka shfaqur interes konkret, por deri më tani ende nuk ka kaluar nga fjalët te veprimet.

Nëse përgjigjja e lojtarit për Interin do të jetë pozitive, Al-Hilal është i gatshëm të përfshijë edhe një kundërshpërblim teknik në marrëveshje. Emrat në diskutim janë Francesco Acerbi dhe Stefan de Vrij, dy profile që pëlqehen nga klubi saudit për të përforcuar repartin defensiv.

Orët e ardhshme pritet të jenë vendimtare për të ardhmen e Cancelo-s, mes një rikthimi në Milano dhe një pritjeje për lëvizjet e Barcelonës.