Interi fitore dramatike në “frymën e fundit” ndaj Veronës

Interi ka marrë një fitore të rëndësishme me rezultat 2-1 ndaj Veronës në ndeshjen e mesditës së javës së dhjetë të Serie A, duke regjistruar suksesin e dytë radhazi në kampionat dhe duke u afruar në vetëm një pikë larg Napolit, që kryeson renditjen, në pritje të sfidës Milan–Roma.

Zikaltrit e zhbllokuan ndeshjen pas vetëm 15 minutash falë një perlë të Piotr Zielinskit, i cili goditi me të parën nga jashtë zonës pas një asisti fantastik të Calhanoglut nga goditja e këndit. Megjithatë, pas avantazhit, skuadra e Chivu uli ndjeshëm ritmin dhe u përpoq të kontrollonte lojën, por në minutën e 40-të Verona barazoi me një gjuajtje të fuqishme të Giovane-s. Pak para pushimit, Orban goditi shtyllën e djathtë të Sommerit, duke rrezikuar përmbysjen.

Në pjesën e dytë, trajneri Chivu ndërhyri me ndryshime të shumta, duke aktivizuar Dumfriesin, Espositon, Barellan dhe Dimarcon, por pavarësisht presionit të madh të zikaltërve, Verona e drejtuar nga Zanetti qëndroi fort në mbrojtje dhe tentoi të godiste në kundërsulm. Kur gjithçka dukej se po mbyllej në barazim, në minutat shtesë ndodhi episodi vendimtar: një kros i Barellës u devijua në mënyrë të pafat nga Frese drejt portës së tij, duke befasuar portierin Montipò.