Interi i falet kapitenit Lautaro ndaj Atalantës dhe rimerr kreun

Pas humbjes ndaj Bolognës në Superkupë, Interi kthen menjëherë faqen në kampionat dhe e mbyll vitin 2025 i vetëm në krye të renditjes. Në javën e 17-të të Serie A, skuadra e Chivu triumfon 1-0 ndaj Atalantës, duke iu përgjigjur fitoreve të Milanit, Napolit dhe Juventusit dhe duke mbrojtur vendin e parë me 36 pikë.

Në New Balance Arena, zikaltërit marrin kontrollin e ndeshjes që në pjesën e parë, duke diktuar ritmin dhe krijuar rastet më të pastra. Megjithatë, Thuram dhe shokët e tij nuk arrijnë të thyejnë mbrojtjen kompakte bergamaske.

Në fraksionin e dytë, Luis Henrique dhe Barella shpërdorojnë dy mundësi të arta për të kaluar Interin në avantazh. Momenti vendimtar vjen në minutën e 65-të, kur Pio Esposito përfiton nga një gabim i Djimsitit, topi shkon te Lautaro Martinez, i cili me një goditje të saktë me të majtën zhbllokon rezultatin dhe vendos fatin e ndeshjes.

Në minutat e fundit, Atalanta përpiqet të reagojë dhe i shkon shumë pranë barazimit, por Samardzic humbet një rast të pastër përpara portës.