Interi tenton sonte përmbysjen ndaj Bodo-s, por historia nuk e ndihmon …

Inter do të kërkojë një përmbysje të madhe mbrëmjen e sotme në “Meazza”, ku përballë Bodø/Glimt do të vendoset skuadra që do të sigurojë kualifikimin në fazën e 1/8-ave të Champions League. Pas humbjes 3-1 në ndeshjen e parë, zikaltërit kanë nevojë për një paraqitje të madhe për të kthyer rezultatin.

Statistikat ofrojnë disa arsye optimizmi për italianët. Interi ka fituar gjashtë nga shtatë përballjet e fundit me eliminim direkt në Champions dhe ka triumfuar në shtëpi në pesë nga shtatë ndeshjet e fundit të këtij lloji. Gjithsesi, historia tregon se përmbysjet pas një humbjeje me dy gola diferencë nuk janë të shpeshta për zikaltërit, të cilët kanë kaluar më tej vetëm katër herë në 11 raste të tilla.

Nga ana tjetër, norvegjezët vijnë me besim pas precedentit të sezonit të kaluar, kur eliminuan Lazio në çerekfinalet e Europa League. Megjithatë, ajo mbetet e vetmja herë që klubi nordik ka nxjerrë jashtë një skuadër italiane në pesë përballje me dy ndeshje.

Skuadra e drejtuar nga trajneri Kjetil Knutsen synon të shkruajë historinë duke u bërë ekipi i parë norvegjez që kalon një tur me eliminim direkt në Champions League. Në krahun tjetër, Interi do t’i besojë repartit ofensiv, ku nga minuta e parë pritet të startojnë Francesco Pio Esposito dhe Marcus Thuram, me misionin për të udhëhequr përmbysjen dhe për të çuar zikaltërit në raundin tjetër.