Jashari nis aventurën te Milani, sot është dita e vizitave dhe zyrtarizimit

Ardon Jashari ka nisur sot zyrtarisht aventurën e tij si futbollist i Milanit. Pas mbërritjes së tij në aeroportin e Linate mbrëmjen e kaluar, mesfushori zviceran është paraqitur herët në mëngjes në klinikën “La Madonnina” për të kryer vizitat mjekësore të zakonshme.

Programi i ditës së tij të parë përfshin gjithashtu testet e përshtatshmërisë sportive në Qendrën Ambrosiano, pas së cilës do të vijojë me firmosjen e kontratës në ambientet e “Casa Milan”.

Nëse gjithçka shkon sipas planit dhe pa vonesa, Jashari do t’u bashkohet bashkëlojtarëve të rinj në stërvitje në orën 18:00 në Milanello, nën urdhrat e trajnerit Massimiliano Allegri.

Mesfushori 22-vjeçar ka zgjedhur edhe numrin e fanellës që do të mbajë te Milani: numrin 30. Transferimi i tij nga Club Brugge u bë zyrtar dje, pasi u arrit marrëveshja përfundimtare mes klubeve: belgjikët do të përfitojnë 34 milionë euro menjëherë, plus 4.5 milionë euro bonus. Kjo është një shitje rekord për një klub belg, që nuk ka arkëtuar kurrë më parë një shumë të tillë nga një lojtar.

Jashari ka firmosur një kontratë pesëvjeçare me pagë prej 2.5 milionë euro në sezon, plus bonuse të ndryshme.