Juve fiton me vuajtje ndaj Spal, Ronaldo vendos tjetër rekord (VIDEO)

Juventus merr fitoren e radhës në kampionatin italian, duke marrë 3 pikë disi të vuajtura në transfertën ndaj Spalit. Skuadra e Sarrit mori një triumf 2-1, që do të komplikohej nga gabimet në mbrojtje të skuadrës torineze. Cristiano Ronaldo nuk di të ndalet.

Sulmuesi portugez vijon të thyejë rekorde, teksa ka shënuar për herë të 11-të radhazi në kampionat duke barazuar Batistutën dhe Quagliarella-n. CR7 u shërbye mjaft mirë në minutën e 39-të nga Cuadrado, i cili krosoi mjaft mirë në krahun e djathtë. Në fillimin e pjesës së dytë, Juventus shënoi edhe golin e dytë me Ramsey, që konkretizoi një aksion të iniciuar nga Dybala.

Ky ishte goli i dytë për uellsianin këtë sezon. Spal nuk u dorëzua, teksa do të fitonte një penallti të shkaktuar nga një ndërhyrje e gabuar e Ruganit. Nga pika e bardhë Petagna do të arrinte që të realizonte, por vendasit do të hasnin vështirësi për të gjetur hapësira në minutat në vijim. Me këtë fitore Juventus ruan vendin e parë, me 60 pikë, 4 më shumë se Lazio. /R.Lika-Koha Jone/