Juventus blindon yllin e skuadrës Kenan Yildiz deri në vitin 2030

Juventusi nis një plan të qartë për të ardhmen duke blinduar yllin e skuadrës, Kenan Yildfiz. Pas vitesh të vështira dhe paqartësish, bardhezinjtë po ndërtojnë një projekt teknik që jep shpresa konkrete për të ardhmen. Emërimi i Luciano Spallettit në pankinë nuk ka sjellë vetëm garanci në planin afatshkurtër, por mbi të gjitha ka krijuar bindjen se në Torino ka ardhur trajneri i duhur për të ndërtuar një cikël të ri fitues, brenda dhe jashtë fushës.

Rikthimi i Juventusit në nivelet më të larta kalon domosdoshmërisht nga mbajtja e lojtarëve kyç, dhe në qendër të projektit është vendosur Kenan Yildiz. Talenti turk ka qenë një nga zbulimet e sezonit dhe në muajt e fundit ka tërhequr interesin e disa gjigantëve evropianë si Manchester United, Chelsea dhe Real Madrid. Kontrata e tij e mëparshme, me afat deri në vitin 2029 dhe pagë 1.6 milionë euro në sezon, nuk pasqyronte më rolin dhe peshën që ai ka fituar në skuadër.

Drejtuesit e Juventusit, të vetëdijshëm se besueshmëria e projektit lidhet edhe me konfirmimin e Yildizit, kanë arritur marrëveshjen për rinovimin e kontratës. Sulmuesi ka firmosur deri në vitin 2030, me një pagë prej 6 milionë eurosh në këtë sezon dhe 7 milionë plus bonuse nga sezoni i ardhshëm. Një kontratë nga më të lartat në skuadër, që konfirmon Yildizin si një shtyllë të Juventusit të së tashmes dhe të së ardhmes.