Juventus kërkon një shkëmbim “kokë më kokë” me United

Juventusi ka në plan një shkëmbim të madh për merkaton dimërore, me sulmuesin Joshua Zirkzee si objektiv kryesor për sulmin. Bardhezinjtë e kanë ndjekur prej kohësh holandezin, i cili është shumë i pëlqyer në Torino, veçanërisht nga trajneri Thiago Motta, i cili e ka stërvitur te Bologna një vit më parë.

Zirkzee u transferua në verë te Manchester United, por ka hasur vështirësi në përshtatje dhe tashmë po kërkon një ndryshim ambienti. Rikthimi në Serie A duket të jetë një mundësi e mirë për të, pasi ka pasur disa nga momentet më të suksesshme të karrierës së tij.

Për të siguruar shërbimet e 23-vjeçarit, Juventusi ka përgatitur një propozim tërheqës. Sipas “Talk Sport”, klubi italian ka ofruar Dusan Vlahovic dhe kërkon Zirkzee në shkëmbim. Vlahovic ka 18 muaj të mbetur në kontratën e tij dhe bisedimet për rinovim janë bllokuar. Juventus, duke mos dëshiruar ta humbasë lojtarin pa përfitim, ka gjetur një mundësi për të përfituar nga situata, duke ofruar Vlahovic për të siguruar Zirkzee.