Juventus kërkon sërish Elseid Hysajn, projektohet shkëmbimi me De Sciglio-n

Maurizio Sarri mund të ribashkohet sërish me Elseid Hysaj. Pasi tentativave që bëri në verë, Juventusi i rikthehet pistës që e çon te mbrojtësi shqiptar dhe në këtë merkato të dimrit mundësitë janë më të mëdha që ky operacion të realizohet me sukses. Sarri e do në skuadër nxënësin e tij të cilin e ka patur edhe në eksperiencat me Empolin dhe Napolin dhe Hysaj kurrsesi nuk mund t’i thojë jo mësuesit të tij.

Mbrojtësi shqiptar ka gjetur pak hapësira këtë sezon në formacionin e Napolit fillimisht me Ancelottin në stol dhe së fundmi me Genaro Gattuson dhe kjo është një nga arsyet kryesore që shkodrani do ta priste krahëhapur një kalim të mundshëm te Juventusi.

Mediat italiane shkruajnë se drejtuesit e dy klubeve po punojnë për një shkëmbim mes Mattia De Sciglios i cili do të transferohet te Napoli dhe Elseid Hysaj i cili do të përshkojë rrugën e kundërt dhe do të veshë fanellën e kampionëve të Italisë.