Juventus mund Genoa-n dhe shkon 1 pikë larg zonës Champions

Juventus shfrytëzon gabimet e rivalëve në garën për një vend në Champions League dhe rikthehet te fitorja në javën e 31-të të Serie A, duke mposhtur 2-0 Genoa në shtëpi.

Skuadra bardhezi, e drejtuar nga Luciano Spalletti, e zhbllokoi sfidën shumë shpejt. Vetëm pas katër minutash lojë, nga një goditje këndi, Gleison Bremer devijoi saktë topin për të kaluar vendasit në avantazh 1-0.

Genoa hasi vështirësi në ndërtimin e aksioneve dhe në minutën e 17-të erdhi goditja e dytë: Andrea Cambiaso shërbeu për Francisco Conceição, i cili pasoi në qendër për Weston McKennie. Mesfushori amerikan nuk gaboi dhe dyfishoi shifrat në 2-0.

McKennie ishte pranë golit të tretë në fundin e pjesës së parë, ndërsa portieri Mattia Perin u detyrua të largohej në pushim për shkak dëmtimi.

Në pjesën e dytë, Juventusi vazhdoi të kontrollojë lojën. Sërish McKennie iu afrua golit, ndërsa Jonathan David goditi shtyllën. Nga ana tjetër, trajneri Daniele De Rossi provoi të ndryshojë ritmin duke aktivizuar Tommaso Baldanzi në vend të Junior Messias.

Momenti kyç për miqtë erdhi në minutën e 74-të, kur u akordua një penallti për Genoa-n. Por Martín Payero u ndal nga portieri Michele Di Gregorio, i cili u bë protagonist dhe siguroi qetësinë në minutat e fundit. Me këtë fitore, Juventusi ngjitet në kuotën e 57 pikëve, vetëm një pikë larg vendit të katërt që mbahet nga Como dhe tre pikë mbi Roma.