Juventus në krizë totale, mundet edhe nga Lazio në Olimpico

Java e tetë e Serie A u mbyll me një fitore të rëndësishme të Lazios në “Olimpico”. Skuadra e ish-trajnerit Maurizio Sarri triumfoi 1-0 ndaj Juventusit të Igor Tudor, duke e futur ekipin bardhezi në një periudhë të vështirë rezultatesh.

Ndeshja u vendos që në minutën e 9-të, pas një gabimi në dalje të mbrojtësit David, që devijoi keq me kokë. Topi përfundoi te Cataldi, i cili pasoi për Basic, mesfushori kroat gjuajti nga jashtë zonës dhe me ndihmën e një devijimi të Gattit mposhti portierin Perin për golin e vetëm të takimit.

Në pjesën e dytë, Juventusi tentoi me ngulm barazimin. Tudor hodhi në fushë të gjitha armët ofensive, por përpjekjet e bardhezinjve nuk u konkretizuan, ndërsa Lazio administroi me kujdes rezultatin deri në fund.

Me këtë humbje, Juventusi regjistron disfatën e tretë radhazi mes kampionatit dhe Champions League, duke mbetur gjashtë pikë pas Napolit dhe Romës. Ndërkohë, Lazio ngjitet në pjesën e sipërme të tabelës, duke marrë frymë më lirisht pas një starti të vështirë sezonal.