Juventusi mirëpret Vlahovic, sulmuesi serb gati për të qenë protagonist

Dusan Vlahovic është rikthyer në qendrën stërvitore të Juventusit, Continassa, pas një periudhe rikuperimi post-operator në Beograd. Sulmuesi serb, i cili iu nënshtrua një operacioni, ka punuar intensivisht me një trajner personal për t’u kthyer sa më shpejt në fushë. Tani ai do të vazhdojë programin e rikuperimit me stafin e Juventusit, me objektivin për t’u vënë në dispozicion të skuadrës në fillim ose në mes të muajit mars. Kthimi i tij përkon me ditën e parë të Holm dhe Boga në Continassa.

Vlahovic shfaqet dukshëm i rigjallëruar nga fakti që klubi nuk ka afruar një tjetër sulmues gjatë merkatos së janarit, gjë që rrit ndjeshëm mundësitë e tij për të pasur më shumë hapësira në pjesën e mbetur të sezonit. Ai aktualisht është në vitin e fundit të kontratës së tij me bardhezinjtë. Megjithatë, ardhja e trajnerit e kishte rikthyer atë në qendër të planeve të Juventusit, duke mbajtur gjallë shpresat për një rinovim të mundshëm.

Për momentin, klubi nuk ka bërë asnjë propozim zyrtar për zgjatjen e kontratës, por vetë lojtari është i hapur për një vazhdimësi të bashkëpunimit dhe këtë disponibilitet ia kishte besuar trajnerit. Vlahovic është kthyer në qendrën sportive i lumtur dhe i motivuar, duke shprehur dëshirën e tij për t’u bërë protagonist shumë shpejt dhe për të fituar një tjetër trofe me Juventusin.

Mbetet për t’u parë nëse do të rihapet vërtet një dritare për rinovimin e tij, ndoshta duke ndjekur shembullin e menaxhimit të situatës së Weston McKennie në vitet e fundit. Edhe mesfushori amerikan dukej disa herë jashtë planeve të klubit, por pas një zgjatjeje të shkurtër njëvjeçare për sezonin e kaluar, ai tani është pranë zgjatjes së qëndrimit të tij në Torino.

Marrë nga La Gazzetta dello Sport