Kapiteni Gjimshiti: Presioni ishte më i madh se në finalen e Europa League, por ia dolëm

Mbrojtësi dhe një nga liderët e Kombëtares shqiptare, Berat Gjimshiti, ka folur pas triumfit historik të kuqezinjve në transfertë ndaj Serbisë me rezultatin 0–1, duke e cilësuar këtë si një nga fitoret më të mëdha të skuadrës sonë në vite.

Në prononcimin e tij, kapiteni i Atalantës theksoi se presioni ishte jashtëzakonisht i madh, por ekipi tregoi karakter të fortë: “E rëndësishme ishte fitorja. Presioni ka qenë shumë i lartë, sepse kishim ndjenjën që kjo ndeshje duhej fituar me çdo kusht. Në Shqipëri nuk u ndje aq shumë, por kur zbritëm në Serbi, atmosfera ndryshoi plotësisht — ishte edhe më e fortë se në finalen e Europa League.”

Gjimshiti vlerësoi edhe paraqitjen e Arlind Ajetit, i cili u rikthye në Kombëtare pas një kohe të gjatë dhe dha një ndihmë të madhe në mbrojtje: “Fillimi ishte i vështirë, për shkak të nervozizmit, por e gjithë skuadra reagoi shkëlqyeshëm. Komplimente për Ajetin, i cili pas një kohe të gjatë jashtë ekipit, bëri një ndeshje të madhe.”

Në fund, mbrojtësi kuqezi falënderoi tifozët shqiptarë për mbështetjen e jashtëzakonshme nga çdo cep i botës: “Kemi shumë kohë që luajmë bashkë dhe e njohim mirë njëri-tjetrin. Faleminderit tifozëve për mbështetjen, janë më të mirët në botë. Sot na kanë parë dhe përjetuar kudo që ka shqiptarë.”