Klopp i përgjigjet pyetjes së shekullit: Messi më i miri, por Ronaldo është perfekt!

Kush është më i mirë? Messi apo Cristiano Ronaldo? Pyetjes më të shpeshtë në futbollin modern i është përgjigjur edhe Jurgen Klopp, një nga trajnerët më të mirë në botë. Strategu gjerman ka analizuar të dy futbollistët duke dhënë mendimin e tij për cilësitë e tyre më të mira.

“Unë zgjedh Messin, por admiroj edhe Ronaldon. Shpjegimi është në vijim. Ne kemi luajtur kundër të dyve tashmë dhe janë pothuajse të pamundur për t’u mbrojtur. Messi ka karakteristika shumë më të pakta fizike që nga lindja. Nëse do të mund të pikturonit vetëm një lojtar të përsosur, ai duhet të ketë lartësinë e Ronaldos. Ai mund të kërcejë dhe të vrapojë aq lart apo shpejt, sa nuk e bën dot askush tjetër. Ronaldo është absolutisht i përsosur dhe profesional, nuk mund të jetë më i mirë.

Dhe, nga ana tjetër është Messi i vogël në trup, por që i bën të gjitha gjërat e magjishme të duken kaq të thjeshta. Për këtë arsye, mua më pëlqen pak më shumë si lojtar në fushë. Por, Cristiano është gjithashtu një lojtar absolutisht i pabesueshëm. Prandaj është vërtet e vështirë të zgjedhësh më të mirin.

E përbashkëta e tyre? Të dy kanë lënë gjurmë të pashlyeshme në futbollin global për një kohë kaq të gjatë. Ka edhe disa lojtarë më të rinj, me potencial të ngjashëm, por ta bësh këtë gjatë kësaj periudhe kohore, mbi një dekadë, është edhe më e pabesueshme. Gjynah që do të plaken edhe ato”, u shpreh në një intervistë të dhënë për “Freekickerz”.