Klose largohet nga fusha, së shpejti trajner

Legjenda e Gjermanisë, Miroslav Klose, përfundimisht ka vendosur të varë këpucët në gozhdë pas aventurës së tij të fundit në karrierë te Lazio (2015-2016). Emri i “bomberit” ka qenë i lidhur me një kalim të mundshëm në kampionatin amerikan të futbollit apo në ish-skuadrën e tij, Kaiserslautern, por 38-vjeçari e ka parë si zgjidhje më të pranueshme largimin e tij nga futbolli dhe marrjen e një pozicioni në kombëtaren gjermane. Klose do të ndjekë një kurs i udhëhequr nga trajneri Joachim Löw dhe drejtori teknik Hansi Flick, të dy në skuadrën kampione të botës. Kështu, ai shumë shpejt mund të marrë drejtimin e një skuadre. Njëkohësisht, ish-sulmuesi i Bayern München-it do të jetë pjesë e stafit teknik të Gjermanisë.

“Kam shijuar sukseset më të mëdha me kombëtaren. Ishte një kohë fantastike dhe e paharrueshme për mua. Ja pse jam i lumtur që rikthehem në Federatën Gjermane të Futbollit”, – tha Klose për sajtin e DFB-së. “Gjatë muajve të fundit, ideja e të qëndruarit në fushë në një pozicion tjetër, atë të trajnerit, m’u ngulit në mendje. Unë gjithmonë e kam pëlqyer zhvillimin e taktikave në futboll, përgatitjet e ndeshjeve dhe leximin e lojës gjatë kohës kur luaja vetë. U jam mirënjohës Jogit dhe Hansi Flick-ut për këtë mundësi“, – shtoi ai.

Klose e nisi karrierën e tij si profesionit te Hamburg, teksa më pas veshi fanellat e skuadrave me emër si Kaiserslautern, Werder Bremen, Bayern München dhe Lazio. Sukseset më të mëdha shtatlarti me origjinë polake i arriti në Mynih, aty ku fitoi dy herë kampionatin dhe Kupën e Gjermanisë.

Në sezonin 2005-2006, Klose u shpall kryegolashënuesi i Bundesligës. Gjithsej, sulmuesi i madh ka luajtur 137 ndeshje për Gjermaninë (vetëm Lothar Matthäus ka më shumë paraqitje, 150). “Ujku” ka shënuar gjithsej 71 gola me fanellën e bardhë, duke u bërë golashënuesi më i mirë në historinë e kombëtares gjermane. Në vitin 2014 ai fitoi Kupën e Botës, ndërsa 12 vjet më parë kishte arritur deri në finale. Klose është gjithashtu kryegolashënuesi i finaleve të Botërorit, me 16 gola në katër turne. Fat të mbarë, kampion!