Kosova bëhet e artë në Europianin e Xhudos

Kosova vijon të jetë një nga përfaqësueset më të forta të Europës në Xhudo dhe çdo vit në aktivitetet më të rëndësishme sportistet dardane ngrejnë lart emrin e Kosovës.

Nuk mund të mungonin medaljet e arta në Europianin që po zhvillohet në Portugali teksa për here të parë Distria Krasniqi provoi shijen e kampiones së Europës për peshat deri në 48 kg.

E ndihmuar edhe nga fati, Distria triumfoi në finalen që i dha të artë pa u ndeshur pasi rivalja ukrainase Daria Bilodid nuk u paraqit për shkak të një dëmtimi.

Më para xhudistja kosovare kishte mposhtur në gjysmëfinale një rivale ruse si Sabi Gilazova dhe në çerekfinale italianen Francesca Giorda. Një sukses i tillë fut tashmë emrin e Distria Krasniqit në librat e Artë të Kampionateve Europiane por nuk mbaron këtu sepse Kosova mori edhe një medalje bronzi me Nora Gjakovën e cila mposhti në kategorinë 57 kg rivalen gjeorgjiane, Eteri Lipartelianin.

Një ditë fantastike kjo për Kosovën që merr medalje të rëndësishme duke bërë krenarë dardanët ndërsa menjëherë presidentja e Kosovës, Vjosa Osmani përgëzoi sportistet për sukseset që arritën.