Marash Kumbulla ka debutuar këtë sezon në Seria A, por impakti i mbrojtësit të kombëtares sonë te Verona ka qenë fantastik. Futbollisti shkodran shënoi një gol, duke u bërë mbrojtësi me moshën më të re që shënon në 5 kampionatet kryesore. Në ditët e fundit është përfolur shumë për një interesim të Juventusit, teksa agjenti i 19-vjeçarit Gianni Vitali ka sqaruar situatën në një intervistë për “Tuttojuve”.
“Marash po bën shumë mirë, jemi të kënaqur nga loja e tij dhe shpresoj që të vazhdojë të bëjë prezantime të tilla te Verona. Ai ndiqet nga shumë klube, italiane dhe europiane. Me siguri që interesimi i një klubi të madh si Juventusi na bën shumë të kënaqur, por për momentin nuk ka pasur asnjë kontakt me klubin bardhezi. Djaloshi, i cili po habit dhe që nuk njihej, mendon vetëm për të bërë mirë te Verona”, deklaroi Vitali.
Juventusi mund të nis kontaktet që në muajin janar për të blerë kartonin e Kumbullës dhe më pas për ta lënë në formë huazimi te Verona, që të fitojë më shumë eksperiencë. Një strategji që kampionët e Italisë e kanë ndjekur me disa futbollistë të talentuar. /Rozalb Lika-Koha Jone/
