Kur një yll largohet nga fusha dhe bëhet pjesë e yjësive të përjetësisë, Thomas Müller i jep fund epopesë së tij me Bayern Munich

Ka momente në sport që nuk janë thjesht funde karriere, por kapituj që mbyllen me madhështi në librin e pavdekshëm të kujtesës kolektive. Thomas Müller, një nga figurat më emblemë të futbollit gjerman dhe një nga shtyllat e historisë moderne të Bayern Munich, i ka thënë “stop” aventurës së tij me klubin bavarez, pas më shumë se dy dekadash besnikëri, lavdi dhe pasion të pandërprerë.

Në një ndeshje që më shumë se humbje ishte një përulje simbolike para kohës që kalon, Müller zbriti në fushë për vetëm 10 minuta të fundit dhe shtesat ndaj Paris Saint-Germain, në çerekfinalen e Botërorit për Klube. Nuk kishte nevojë për më shumë minuta për të kuptuar se ishte ky një përshëndetje, jo e zakonshme, por nga ato që mbushin sytë me kujtime dhe zemrën me mirënjohje.

Që nga viti 2000, kur hapi për herë të parë dyert e akademisë së Bayernit, deri tek ndeshja e fundit, ai ka qenë mishërimi i vazhdimësisë, lojtari që nuk u konsumua kurrë, por u bë simbol. Statistikat janë një himn më vete: 756 paraqitje, 250 gola, 276 asistime. Dhe mbi të gjitha, një arkivë trofesh që nuk matet vetëm me numra, por me ndikim dhe besnikëri:
– 13 herë kampion i Gjermanisë
– 6 Kupa të Gjermanisë
– 8 Superkupa Gjermane
– 2 herë kampion i Europës me Champions League
– 2 Superkupa Europe
– 2 Botërorë për Klube

Një palmares që e rreshton atë jo vetëm mes më të mirëve të Bayernit, por në panteonin e futbollit botëror. Müller nuk ishte thjesht një lojtar, por një shenjë dalluese, një kod në ADN-në e Bayernit, një interpretues i padukshëm i hapësirave dhe lojës inteligjente – “Raumdeuter”, siç u pagëzua nga vetë ai.

E ardhmja? Nuk është thënë ende fjala e fundit. Me horizontin që i hapet përtej Atlantikut, Major League Soccer mund të bëhet stacioni i radhës për këtë ikonë të gjallë të futbollit. Ai nuk e ka përjashtuar as bashkimin me Lionel Messin tek Inter Miami:

“Në parim nuk do të kisha problem të luaja me Messin, por aktualisht nuk kam asnjë kontakt direkt me Miamin,” – deklaroi Müller për DAZN, duke lënë gjithçka të hapur.

Por kudo që të shkojë, në cilëndo fushë të shkelë, një gjë është e sigurt: Thomas Müller nuk është thjesht një futbollist që po largohet nga loja, por një yll që ngjitet për t’u bërë pjesë e vezullimit të përjetshëm, atje ku historia ndriçon më fort se dritat e stadiumeve.
AV