Kur publikohet lista e Kombëtares për Ligën e Kombeve? Maran zbulon momentin e grumbullimit

FSHF ka saktësuar se lojtarët e grumbulluar nga trajneri Maran do të njoftohen të premten, në orën 11:00, pak përpara nisjes së konferencës për shtyp të teknikut.

Ndryshe nga grumbullimet e mëparshme, këtë herë lista e Kombëtares nuk do të publikohet përpara konferencës, por pikërisht në momentin kur ajo do të nisë.

Në listën e mungesave të sigurta për shkak të dëmtimeve janë Thomas Strakosha, Myrto Uzuni dhe Arlind Ajeti. Ndërkohë, priten rikthimet në përfaqësuese të Rei Manajt dhe Ernest Muçit.

Seanca e parë stërvitore e Kombëtares do të zhvillohet të hënën e ardhshme, më 21 shtator.

Kuqezinjtë do të kenë një kalendar të ngjeshur në Ligën e Kombeve, me katër ndeshje në harkun kohor 26 shtator–6 tetor. Shqipëria do të përballet me Bjellorusinë, ndërsa ndaj San Marinos do të luajë dy herë, në shtëpi dhe në transfertë. Sfida e katërt do të jetë ndaj Finlandës.