Laporta: Do bëj gjithçka për të mbajtur Messin te Barcelona!

Joan Laporta, ish-numri një i Barcelonës nga 2003 deri në 2010 është një nga kandidatët për president të katalanasve pas largimit të Bartomeut. Në një intervistë për “Radio Marca” ai tregon planet e tij si dhe për të ardhmen e Lionel Messit.

“Do t’i përdorim të gjitha kartat, në mënyrë që Messi të mbetet me ne. Shitja e Cristiano Ronaldos nga Real Madrid kishte edhe rrethana të tjera. Çështja e Leos është unike. Ai do të ishte një nga lojtarët e paktë, si Pelé, që ka luajtur vetëm në një ekip. Kjo çështje nuk bazohet vetëm në para. Do t’i bëjmë një propozim të mirë ekonomik, por nuk do të arrijmë atë që klubet e tjera mund t’i japin. Unë kam një marrëdhënie shumë të mirë me Leo.

Ai e do Barçën. Jam i bindur që po pret me padurim një propozim nga presidenti i ri. Do të bazohet mbi të gjitha në një ekip konkurrues, që mund të fitojë Ligën e Kampionëve. Nëse e bëj këtë propozim, unë do ta respektoj atë. Jam me fat që kam besueshmërinë e Leos. Tani nuk është koha për të folur për Messin, sepse për këtë duhet të jem president”, deklaroi Laporta.