Lazio rikthen interesimin për Kumbullën, ja oferta e Igli Tares

Pasi mbylli transferimin e Muriqit, Igli Tare tashmë ka një tjetër mision, për të rrëmbyer një tjetër futbollist shqiptar. Bëhet fjalë për Marash Kumbullën, i cili prej muajsh është në orbitën e shumë skuadrave të mëdha europiane.

Interi po ngurron të mbyllë marrëveshjen e arritur prej kohësh me futbollistin dhe klubin e Veronës, dhe ashtu siç përfitoi Milani në rastin e Sandro Tonalit, të njëjtën gjë dëshiron të bëjë edhe Lazio me Kumbullën.

Igli Tare ka nisur sërish kontaktet me presidentin e Veronës dhe i ka konfirmuar gatishmërinë e lacialëve për të paguar 15 milionë euro kesh dhe kartonët e 2-3 futbollistëve të rinj për të marrë mbrojtësin e talentuar.

Gjithsesi veronezët janë më të prirur të arkëtojnë sa më shumë para kesh nga shitja e mbrojtësit, sesa futbollistë në këmbim, pasi tashmë kanë një organikë të kompletuar dhe sidomos me emra të rinj.