Lebron Xhejms është personaliteti i vitit në sport

Ishte përmbys në 19 qershor.

Lebron Xhejms fitoi titullin në NBA pas një përmbysjeje të pabesueshme, dhe zuri vend në histori.

“Sports Ilustrejtid”, revista e madhe sportive amerikane, e shpalli Personalitetin Sportiv të Vitit.

Basketbollisti numër 1 i botës ndihmoi Klivlendin të mposhtte një kundërshtar të frikshëm si Golden Stejti I rekordeve, duke qenë në dizavantazh 1-3 në finalet e plej ofit.

Ishte hera e parë në historinë e NBA-së që kjo ndodhte.

Ishte po ashtu hera e parë që Klivlendi shpallej kampion.

Një gjigand i vërtetë i koshit, Lebron u nderua si lojtari më i kompletuar i epokës, dhe ndoshta edhe I të gjitha kohëve.

Lebron u paraqit për të bërë foton e kopertinës së revistës, në Toronto të Kanadasë, me kostumin e tij të bardhë dhe me golf, veçse ishte diçka tjetër që bëri jehonë të madhe.

Xhejms kishte vendosur një paramandë në jakën e xhaketës, një send me domethënie të madhe këto ditë.

Të vendosësh sot në Amerikë një paramandë në veshje, është një deklaratë politike e të gjithë atyre që janë kundër zgjedhjes së Donald Trampit si president.

Ylli i basketbollit bën pjesë në atë grupim të madh që ishte kundër Trampit, për deklaratat e tij ndaj myslimanëve, femrave apo njerëzve me ngjyrë, duke e quajtur të rrezikshëm për Shtetet e Bashkuara të Amerikës.