Llogaritë e italianëve/ Inter mbetet jashtë Top-8, Napoli vë në rrezik edhe kualifikimin

Pas humbjes ndaj Arsenalit dhe barazimit të Napolit në Kopenhagen, renditja e grupit unik në Champions League është komplikuar ndjeshëm për të dy skuadrat italiane, megjithëse me perspektiva të ndryshme.

Interi ka dalë nga zona “Top 8”, por e ka të sigurt të paktën pjesëmarrjen në “play-off”, ndërsa për Napolin ndeshja e fundit do të jetë një përballje “ose gjithçka, ose asgjë”.

Skuadra e Chivu u mund 3-1 nga Arsenali, humbja e tretë radhazi në Champions, një rekord negativ për zikaltërit. Kjo disfatë e ka zbritur Interin në vendin e nëntë, jashtë kualifikimit direkt për në fazën e 1/8-ave. Situata mund të vështirësohet edhe më shumë pas ndeshjeve të radhës, ku luajnë ekipe si Atletico Madrid, Barcelona dhe Liverpool.

Për të synuar “Top 8”, Interi është i detyruar të fitojë në transfertë ndaj Borussia Dortmund, por edhe kjo mund të mos mjaftojë, pasi do të duhet të shpresojë në hapa fals nga rivalët direkt. E vetmja siguri është prania në “play-off”, ndërsa një barazim në Gjermani do t’i garantonte të ishte mes skuadrave të favorizuara.

Shumë më delikate është situata e Napolit. Me 8 pikë dhe aktualisht në vendin e 23-të, skuadra e Contes e ka humbur matematikisht shansin për “Top 8” dhe tani lufton për mbijetesë europiane. Rreziku i eliminimit është real, pasi disa ekipe pas saj kanë ende ndeshje për të luajtur. Gjithçka do të vendoset në sfidën e fundit kundër Chelsea-t në “Maradona”. Napoli duhet patjetër të fitojë dhe, njëkohësisht, të shpresojë në rezultate të favorshme nga fushat e tjera për të siguruar kualifikimin në “play-off”.