Lojërat Olimpike në ditën e 11-­të, ja rezultatet

Dita e djeshme që përkon me ditën e 11­të të garave në “Rio 2016” nuk ka qenë dita e organizatorëve të Brazilit. Me radhë erdhën dy eliminime të papritura në çerekfinale për Kombëtaren e femrave në futboll dhe volejboll po për femra. Brazili në futboll për femra u eliminua nga Olimpiada dhe fatale për skuadrën ishin goditjet nga 11 metrat. Lot për vajzat braziliane ndërsa ato që gëzojnë janë suedezet që kalojnë më tej pas penalltive. Finalja e futbollit të femrave do jetë Gjermani­Suedi pasi gjermanet kanë mposhtur Kanadanë 2­0.

Sfida Brazil-Kanada do të luhet për të përcaktuar fituesen e medaljes së bronzit. Ndeshje e çmendur ishte edhe çerekfinalja e volejbollit për femra mes Brazilit dhe Kinës. Në fund triumfojnë aziatiket 3 me 2 me sete që në gjysmëfinale do të përballen me Holandën. Kalojmë tek atletika dhe aty është zhvilluar finalja e 1500 metrave për femra ku medaljen e artë e ka fituar Kipyegon nga Kenia që ka dhënë kohën 4:08:92. E dyta ka përfunduar etiopianja Dibaba ndërsa amerikania Simpson është ngjitur në shkallën më të ulët të podiumit.

Garë spektakolare ka qenë ajo e peshës mbi 105 kg në peshëngritje ku gjeorgjiani Lasha Talakhadze ka fituar medaljen e artë me një rekord botëror pasi në dygarësh ka ngritur 473 kg. Vendi i dytë dhe medalje argjendi për armenin Gor Minasyan dhe vendi i tretë për një tjetër gjeorgjian Irakli Turmanidze.

Për vendin organizator të Olimpiadës ka pasur gëzim në boks në peshën 60 kg ku braziliani Robson Conceicao ka fituar medaljen e artë ndërsa vendi i dytë i ka takuar boksierit francez Oumiha. Një garë të madhe ka bërë Sandra Perkovic e Kroacisë që ka dominuar finalen e hedhjes së diskut për femra duke kapur rezultatin 69.21 metra. Medalja e argjendit i shkoi francezes Michon dhe ajo e bronzit për sportisten nga Kuba Caballero. Dhe në fund gara e 200 metrave ka qenë një shëtitje për Usain Bolt. Xhamajkani ka vrapuar mjaft mirë duke kontrolluar garën dhe duke arritur kohën 20:28 duke u siguruar gjysmëfinalen.