Luca Toni: Sulmuesit e Juventusit duhet të shënojnë të paktën 50 gola!

Ish-bomberi i kombëtares italiane, Luca Toni, në një intervistë për Gazzetta dello Sport, ka komentuar përbërjen e repartit ofensiv të Juventusit, ku spikasin emrat e Dusan Vlahovic, Jonathan David dhe Loïs Openda.

“Janë tre qendërsulmues ndryshe,” – tha Toni. – “Vlahovic është një killer i vërtetë në zonë, David di të shënojë, por edhe të lidhet me mesfushën, ndërsa Openda është mes një 9-shi klasik dhe një sulmuesi të dytë. Personalisht, unë preferoj 9-shin që e ka golin në ADN. Tudor do të ketë preferencat e tij, por duhet të jetë i zgjuar t’i alternojë sipas meritës.”

Sipas Toni-t, pika kyçe e sezonit do të jetë numri i golave që do të sjellë kjo treshe: “E rëndësishme është që të tre së bashku të arrijnë të paktën 50 gola. Jam optimist, sepse e kam parë nga afër Juventusin dhe më ka impresionuar uniteti i grupit. Tudor ka rikthyer shpirtin juventin dhe ka bërë një punë të madhe në dhomën e zhveshjes. Kush hyn në lojë jep maksimumin, kush del inkurajon shokët.”