City rrezikon përjashtimin nga Premier League, ministrja britanike: Sanksioni maksimal është shumë serioz!

Manchester City mund të përballet me një nga ndëshkimet më të rënda në historinë e Premier League, deri në përjashtimin nga kampionati, nëse vendimi për shkeljet financiare konfirmohet pas procesit të apelimit.

Sekretarja britanike për Kulturën, Lisa Nandy, ka deklaruar se përjashtimi nga Premier League është një nga sanksionet e mundshme në rast se akuzat ndaj klubit konfirmohen përfundimisht.

Çështja lidhet me pretendimet për shkelje të rregullave financiare gjatë periudhës 2009-2018. Sipas raportimeve, në qendër të hetimit janë edhe marrëveshje tregtare të cilësuara si të dyshimta, ndërsa shuma që lidhet me çështjen raportohet të jetë rreth 900 milionë paund.

Manchester City i ka mohuar akuzat dhe ka bërë të ditur se do ta apelojë vendimin, duke pretenduar se disponon prova që, sipas klubit, e mbështesin pozicionin e tij.

Duke folur për Channel 5, Nandy u tregua e kujdesshme përpara përfundimit të procesit të apelimit, por pranoi se rregullat parashikojnë edhe masa ekstreme.

“Nuk dua të paragjykoj asnjë proces apelimi dhe ata kanë të drejtën për një proces të drejtë. Por ajo që mund të them është se sanksioni maksimal është vërtet shumë serioz”, deklaroi ajo.

Nandy shtoi se një klub mund të përjashtohet nga Premier League nëse akuzat konfirmohen, duke theksuar pasojat e mëdha që një vendim i tillë do të kishte.

“Ka sanksione shumë serioze dhe çështja më e rëndësishme është të sigurohemi që rregullat të jenë të qarta, të zbatohen në mënyrë të njëjtë dhe që të veprohet shpejt kur ato shkelen”, u shpreh ministrja britanike.