Marrëveshja e re e Locatellit me Juventusin: Kapiteni firmos deri në vitin 2030

Mes Juventusit dhe Locatellit, një tjetër “po” pritet së shpejti. Duke parë pas, mesfushori ka bërë një rrugë të gjatë me fanellën bardhezi. Ai mbërriti në Torino në verën e vitit 2021, gjatë periudhës së dytë të Allegrit, e cila synonte të rikthente Juventusin në sukses. Pavarësisht kritikave dhe përpjekjeve për ringritje me Thiago Mottën dhe Tudorin, Locatelli mbeti në ekuilibër. Vetëm tani ai është bërë zemra rrahëse e një Juveje të ringjallur nga trajneri Spalletti, i cili e ka risjellë në formë të duhur, duke e riintegruar edhe në kombëtaren italiane.

Marrëdhënia mes lojtarit dhe trajnerit ishte fillimisht një pikëpyetje, sidomos për shkak të precedentit në kombëtare: Spalletti e kishte përjashtuar Locatellin nga Kampionati Evropian, pavarësisht se ai ishte pjesë e ekipit fitues me Mancinin. Megjithatë, mirëkuptimi mes të dyve ishte i menjëhershëm. Kjo krijoi kushtet për hapat e parë drejt konsolidimit të pozicionit të të dyve brenda klubit. Manuel nuk është vetëm kapiteni i Juventusit në këtë moment rilindjeje, por edhe fytyra më domethënëse e atij grupi që në vitet e fundit është kritikuar dhe vënë nën presion nga një ambient kërkues dhe shumë selektiv.

Trajneri i ri ka sjellë ekuilibër dhe i ka rikthyer vlerën disa pjesëve të skuadrës që dukeshin të destinuara për dështim. Locatelli, në këtë fazë metamorfoze, ka qenë në vijën e parë për të mbrojtur grupin, si në fushë ashtu edhe jashtë saj. Mesfushori i Juventusit ka një kontratë që skadon në vitin 2028, por palët kanë nisur tashmë bisedimet për një zgjatje deri në vitin 2030. Këto diskutime janë ende në fazë embrionale, por me disponueshmëri të plotë nga të dyja anët.

Pas Yildizit, i cili konsiderohet lideri teknik i skuadrës, tani është radha e kapitenit. Ndërkohë, klubi po përshpejton prioritetet për të mos u vonuar në menaxhimin e kontratave që janë afër skadencës. Pas konsolidimit të Pinsoglios dhe McKennies, puna është zhvendosur te Vlahoviç. Më pas do të jetë radha e Spallettit, të cilit Juventusi synon t’i dorëzojë një skuadër të pjekur për të bërë shpejt hapin cilësor me disa përforcime. Nisja nga lojtarët që trajneri ka ringjallur është hapi i parë i planit të rritjes: për Locatellin, Juventusi ka qenë gjithmonë një ëndërr, nga e cila ai nuk ka ndërmend të zgjohet.

Marrë nga La Gazzetta dello Sport