Mërgim Mavraj firmos me Aris, do të luajë në një ekip me Bashën

Mërgim Mavraj më në fund ka gjetur skuadër për sezonin e ri. Mbrojtësi i kombëtares është transferuar te ekipi i Arisit të Selanikut, pasi ka arritur marrëveshjen për të nënshkruar një kontratë dy-vjeçare me klubin grek.

Te Arisi, Mavraj do të ketë shok skuadre Migjen Bashën i cili u transferua në Selanik rreth një muaj më parë. Lajmi për arritjen e marrëveshjes u konfirmua për mediat greke nga presidenti i Arisit të Selanikut Theodor Karipidis, i cili në profilin e tij zyrtar ka hedhur një foto të Mavrajt me klubin e tij të ri.

Mbrojtësi ka firmosur tashmë kontratën me klubin grek dhe pas angazhimit me kombëtaren kuqezi do ti bashkohet skuadrës së tij të re.