Messi: Golin e kam më pak obsesion, dua të ndihmoj ekipin!

Lionel Messi provoi largimin nga Barcelona gjatë kësaj vere, por këmbëngulja e drejtuesve dhe kontrata e vlefshme deri në fund të sezonit, bënë që të mbetej në “Camp Nou” të paktën edhe për këtë sezon.

“Pleshti” është më pak produktiv në aspektin e golave dhe asisteve, por më i vlefshëm për skuadrën, pasi krijon hapësira për lojtarë si Ansu Fati e Coutinho, të cilët vijnë nga pas krahëve për të dërguar topin në rrjetë.

Një gjë të tillë e pranoi edhe vetë argjentinasi në një intervistë për mediat spanjolle, ku tha se mendon më pak për të shënuar vetë dhe më tepër për të ndihmuar ekipin.

“Tani golin e kam më pak obsesion dhe provoj të kontribuoj sa të mundem për të ndihmuar ekipin të marrë rezultate”, u shpreh argjentinasi .

Sulmuesi 33-vjeçar është njeriu që ka shënuar më shumë gola për Barcelonën, plot 635 në 734 ndeshje, gjatë të cilave ka dhënë edhe 256 asiste.