Christian Pulisic është gjithnjë e më pranë rinovimit të kontratës me Milanin. Paraqitjet vendimtare dhe golat e shënuar e kanë kthyer futbollistin amerikan në një nga elementet më të rëndësishme të skuadrës, ndaj drejtuesit kuqezi synojnë ta mbajnë atë në Milano për një periudhë afatgjatë.
Sipas raportimeve, marrëveshja e re pritet të zyrtarizohet brenda pak ditësh dhe do ta lidhë Pulisic me klubin deri në vitin 2031. Verën e kaluar, emri i amerikanit u përmend në merkato, pasi disa klube shfaqën interes për të siguruar shërbimet e tij. Mes mundësive të diskutuara ishte edhe një rikthim i mundshëm në Shtetet e Bashkuara, por presidenti Gerry Cardinale nuk e ka konsideruar shitjen e tij si një opsion konkret.
Tani, Milani synon të sigurojë vazhdimësinë e një lojtari që është rikthyer në formë dhe po bën diferencën në fushën e lojës. Rinovimi i Pulisic do të ishte një tjetër sinjal i rëndësishëm për projektin e nisur nga klubi kuqezi.
Pas marrëveshjes me mbrojtësin Strahinja Pavlović, drejtuesit po punojnë për të ardhmen e amerikanit.
Një tjetër emër në planet e Milanit është Adrien Rabiot. Mesfushori francez konsiderohet një pjesë e rëndësishme e skuadrës dhe palët kanë nisur kontaktet për të diskutuar të ardhmen e tij.
Synimi i klubit është që edhe Rabiot të nënshkruajë një kontratë deri në vitin 2031, duke konsoliduar kështu bërthamën e skuadrës për sezonet e ardhshme.