Milani mund me përmbysje Comon, Rabiot shkëlqen me dopietë

Milani vazhdon ndjekjen e Interit dhe nuk gabon në transfertën e vështirë ndaj Comos. Kuqezinjtë fituan 3-1 në ndeshjen e rikuperimit të javës së 16-të të Serie A, duke përmbysur disavantazhin fillestar dhe duke mbajtur diferencën prej tre pikësh nga kryesuesit zikaltër.

Ndeshja nisi në ngjitje për skuadrën e Allegrit. Como, i drejtuar nga Fabregas, gjeti avantazhin që në minutën e 10-të me Kempf, duke vënë në vështirësi serioze mbrojtjen mike. Në pjesën e parë vendasit krijuan edhe raste të tjera të pastra, por Milani u mbajt në lojë falë një Mike Maignan në version super, autor i tre pritjeve vendimtare që shmangën një disavantazh më të thellë.

Momenti kyç erdhi në minutat shtesë të pjesës së parë, kur Nkunku tregoi qetësi nga pika e bardhë dhe barazoi shifrat, duke ndryshuar rrjedhën e takimit. Në pjesën e dytë Milani u shfaq më i organizuar dhe më konkret, duke marrë gradualisht kontrollin e lojës. Protagonisti absolut ishte Adrien Rabiot. Mesfushori francez realizoi golin e avantazhit në minutën e 55-të dhe vulosi përfundimisht fitoren në minutën e 87-të, duke firmosur dopietën personale dhe suksesin 3-1 të kuqezinjve. Një paraqitje që konfirmon momentin e shkëlqyer të Milanit dhe peshën gjithnjë e më të madhe të Rabiot në skemat e Allegrit.

Me këtë fitore, Milani ngjitet në kuotën e 43 pikëve, mbetet në ndjekje të Interit me 46 dhe shkëputet nga Napoli, i ndalur nga Parma. Për Allegrin ky është rezultati i 19-të radhazi pozitiv, një seri që barazon atë të epokës Ancelotti dhe mban gjallë garën për titull.