Jose Mourinho feston fitoren e rëndësishme të Real Madridit ndaj Barcelonës, por nuk i kursen kritikat ndaj VAR-it. Trajneri portugez vlerësoi paraqitjen e portierit rezervë Andriy Lunin dhe theksoi forcën e grupit, ndërsa kontestoi vendimin për një ndërhyrje të João Cancelos ndaj Diomande.
José Mourinho e shijoi në maksimum suksesin e Real Madridit në fushën e Barcelonës, një rezultat me peshë të madhe në garën për titullin e La Ligës. Pas festimit në fushë të golit vendimtar të Kylian Mbappé, trajneri portugez tërhoqi vëmendjen edhe në konferencën për shtyp pas ndeshjes, ku nuk munguan ironia dhe polemikat.
I njohur për deklaratat e tij thumbuese, Mourinho vuri në dukje mungesën e pyetjeve të gazetarëve për paraqitjen e Andriy Lunin, i cili u aktivizua në vend të të dëmtuarit Thibaut Courtois.
“Më keni bërë tashmë dy pyetje dhe asnjëra nuk ishte për Lunin. Por, nëse do ta kishim humbur këtë ndeshje për shkak të gabimeve të Lunin, me siguri pyetja e parë ose e dytë do të kishte qenë për të. E vetmja gjë që i thashë Lunin para ndeshjes ishte: ‘Ti stërvitesh për të luajtur, jo për të qëndruar në stol. Dil atje dhe luaj’. Ai zhvilloi një ndeshje me shumë ekuilibër dhe qetësi”, u shpreh Mourinho.
Pavarësisht kënaqësisë për tri pikët, Mourinho nuk i kurseu kritikat ndaj arbitrimit. Këtë herë, trajneri portugez vlerësoi pozitivisht gjyqtarin kryesor, por drejtoi gishtin nga dhoma e VAR-it për një episod që, sipas tij, duhej të ishte ndëshkuar me karton të kuq.
“Është një fitore e madhe për djemtë, kundër një kundërshtari të madh. Gjyqtari zhvilloi një ndeshje shumë të mirë, por VAR-i e zuri gjumi në minutën e 60-të, në një vendim që mund të kishte një ndikim të jashtëzakonshëm në ndeshje.
Për mua, ishte një karton i kuq i pastër për ndërhyrjen e Cancelos ndaj Diomande. Megjithatë, kjo ishte një ndeshje e madhe dhe një fitore e madhe. Djemtë e meritojnë”, përfundoi trajneri portugez.