Mungon vetëm zyrtarizimi, Kumbulla te Lazio për 18 milionën euro

Marash Kumbulla me shumë mundësi do të luajë te Lazio në sezonin e ardhshëm. Pas një takimi mes drejtuesve të Lazios dhe Veronës, është arritur një akord paraprak  Presidenti Lotito e drejtori sportive Tare janë takuar në Villa San Sebastiano me presidentin e Veronës Maurizio Setti e drejtorin sportiv Tony D’Amico për të mbyllur cështjen e mbrojtësit 20 vjecar të Kombëtares shqiptare.

Kumbulla kishte gjithashtu një lloj prioriteti për lacialët, ku ndihet i mbrojtur në klub nga prezenca e Tares dhe i mirëpritur në dhomat e zhveshjes nga Thomas Strakosha. Lëvizja e shpejtë e Lazios ka rrëzuar pretendimet e Juventus dhe Inter, që për qendërmbrojtësin e Hellas kishte vënë në tavolinë 25 milionë euro plus bonus.

Bardhekaltrit kanë përshpejtuar manovrën, për të arritur akordin me veronezët, duke shmangur ankandin. Për të mbyllur tratativën mbeten akoma detajet e fundit, por në shtëpinë e Lazios ka optimizëm të madh mbi arritjen e operacionit. Palët po negociojnë mbi bazën e 18 milionë euro plùs dy lojtarë si pjesë shkëmbimi teknik: flitet për Lombardin, aktualisht në huazim tek Salernitana, dhe Berishën që do të kthehet nga Gjermania.