Muriqi hyn në histori me Mallorcan, kalon Eto’on dhe bëhet golashënuesi më i mirë i klubit

Vedat Muriqi ka hyrë në historinë e klubit spanjoll Mallorca, duke u bërë golashënuesi më i mirë i të gjitha kohërave për skuadrën ishullore. Sulmuesi i Kombëtares së Kosovës po kalon një sezon të shkëlqyer dhe me paraqitjet e tij ka arritur të shkruajë emrin mes figurave më të rëndësishme të klubit.

Me golat e realizuar së fundmi, Muriqi ka kaluar një tjetër emër të madh të futbollit botëror, Samuel Eto’o. Ish-sulmuesi kamerunas, i cili ka lënë gjurmë në karrierën e tij me disa klube të mëdha evropiane, mbante deri tani rekordin me 54 gola të shënuar me fanellën e Mallorca-s. Tashmë ky rekord i përket futbollistit kosovar, i cili ka treguar vazhdimësi dhe instinkt të jashtëzakonshëm para portës.

Momenti historik erdhi në përballjen ndaj Rayo Vallecano-s, ku Muriqi ishte protagonist absolut. Ai realizoi dy herë vetëm në pjesën e parë, duke i dhënë skuadrës së tij një avantazh të rëndësishëm dhe duke vulosur njëkohësisht hyrjen në histori. Goli i parë erdhi në minutën e 36-të pas një aksioni të ndërtuar mirë dhe asistit të Samu Costas, ndërsa vetëm katër minuta më vonë sulmuesi shënoi sërish pas pasimit të Luvumbos.

Forma e tij këtë sezon ka qenë vendimtare për objektivat e Mallorca-s. Përveç golave, Muriqi ka spikatur edhe për lojën fizike, aftësinë në duelet ajrore dhe ndikimin që ka në repartin ofensiv. Ai është kthyer në pikën kryesore të skuadrës dhe një nga lojtarët më të dashur për tifozët.

Ky sukses është një arritje e madhe edhe për futbollin kosovar, pasi një lojtar i Kombëtares së Kosovës po lë gjurmë në një nga kampionatet më të forta në botë, La Liga. Muriqi vazhdon të tregojë se me punë dhe përkushtim mund të arrihen nivelet më të larta.

Me këtë rekord të ri, emri i Vedat Muriqit tashmë është skalitur përgjithmonë në historinë e Mallorca-s dhe në kujtesën e tifozëve të klubit spanjoll