Ndryshimet e trajnerëve/ Rekordi në Bolivi, në Shqipëri komandon Flamurtari

Një nga raportet më kurioze të Observatorit të Futbollit CIES, që çdo javë përmbledh tematika të ndryshme të bazuar në statistika, është ai mbi ekipet që ndërrojnë më shpesh trajnerët e tyre. Duke parë uljet dhe ngritjet e tyre në Superioren shqiptare, të gjithë do të mendonim që vendi ynë të do ishte në majat e klasifikimit.

Sipas CIES, që ka analizuar 84 vende të ndryshme, është Bolivia vendi ku roli i trajnerit është më  i paqëndrueshëm, me 8 ekipe që kanë ndryshuar mesatarisht 9 trajnerë nga viti 2015. Ndërkohë që në Kategorinë Superiore janë ndryshuar mesatarisht 6 trajnerë, duke zënë vendin e 9-të në këtë renditje, para Serbisë.

Ekipi më i pasigurt në botë ndodhet pikërisht në Bolivi, quhet Real Potosi dhe ka ndërruar 20 trajnerë në 5 vitet e fundit. Praktikisht, trajnerët në atë ekip nuk arrijnë as të mbajnë mend emrat e lojtarëve. Ndjekin ekipin bolivian peruvianët e Cusco dhe paraguaianët e Club Sportivo Luqueno me 16.

Në Shqipëri rekordin e mban Flamurtari me 11 trajnerë të ndryshuar nga viti 2015 deri në fundin e 2019. Skuadra vlonjate mes krizave të shumta ekonomike, renditet në vendin e katërt, së bashku me shumë ekipe të tjera në Europë. Në Europë, rekordi shkon në Bosnje, me Zenicën që ka ndërruar 14 të tillë, ndërkohë që ekipi më i njohur është sigurisht Udinese e Serie A, që në 5 vjeçarin e fundit ka ndërruar 10 të tillë.