Ndryshon gjithçka, Nico Williams i ka thënë “po” Barcelonës

Nico Williams duket se ka vendosur që t’i bashkohet Barcelonës gjatë kësaj vere. Gazeta “Sport”, duke u nisur nga burime brenda klubit blaugrana ka bërë me dije se vetë sulmuesi i Bilbaos dhe kombëtares spanjolle i ka dhënë miratimin e tij një transferimi te Barcelona.

Ai do të jetë shok skuadra me Lamine Jamal, që së bashku ishin dy nga shtysat më të forta të Spanjës drejt titullit të katërt kampion Europe. Ndërkaq, të njëjtat burime nga klubi i Barcelonës kanë bërë me dije se kupola drejtuese e Barçës po lëviz për të gjetur mënyrën e sigurimit të burimeve financiare të nevojshme për nënshkrimin me sulmuesin spanjoll.

Sipas “Sport”, ajo që ka ndryshuar situatën është dëshira e lojtarit për t’u transferuar te Barcelona. Por megjithatë, në klub janë të qartë se duhet të nxitojnë, pasi për nënshkrimin e Nico Williams nuk do të mjaftonin thjesht ato 58 milionë euro që ka vendosur Bilbao si klauzolë për largimin e tij.