Nelson Hysa përplaset me Kabayel jashtë ringut: Gati të ndeshem me ty dhe në shtëpinë tënde!

Pas fitores spektakolare me nokaut ndaj Thomas Narmos në “O2 Arena”, Nelson Hysa nuk e mbylli mbrëmjen vetëm me festën e triumfit. Boksieri shqiptar i pamposhtur e zhvendosi menjëherë vëmendjen te një tjetër sfidë, këtë herë jashtë ringut, duke u përballur me kampionin e botës Agit Kabayel.

Hysa, i cili tashmë numëron 25 fitore në 25 ndeshje, iu afrua zonës VIP ku ndodhej Kabayel dhe mes dy boksierëve nisi një debat i tensionuar. Përplasja “kokë më kokë” u përshkallëzua brenda pak sekondash, duke detyruar ndërhyrjen e stafit të sigurisë për të shmangur një përleshje fizike.

Shkodrani nuk u tërhoq dhe e sfidoi hapur gjermanin, duke e akuzuar se po i shmanget një përballjeje mes tyre.

Hysa: “Ke frikë nga unë?”

Kabayel: “Jo, mund të ndeshem me këdo.”

Hysa: “Atëherë pse nuk po ndeshesh me mua?”

Kabayel: “Mund të ndeshem me këdo. Ku do të dalësh?”

Hysa: “Unë do të vij në Gjermani, në shtëpinë tënde, për t’u ndeshur me ty.”

Kabayel: “S’ka problem.”

Në vijim, Hysa e rriti edhe më shumë dozën e provokimit, duke i premtuar rivalit gjerman një fund me nokaut.

Hysa: “Mos ki frikë, do të të bëj nokaut!”

Kabayel iu përgjigj duke i kërkuar të mos kalonte kufijtë e respektit.

Kabayel: “Mos trego mungesë respekti, sepse do të përfundojë keq për ty.”

Përplasja nuk mbeti vetëm në zonën VIP. Edhe gjatë intervistave për mediat ndërkombëtare, tensioni mes dy boksierëve ishte i dukshëm. Para kamerave të DAZN, Hysa vijoi me deklaratat e forta dhe e bëri të qartë se synimi i tij i radhës është një përballje me Kabayel.