OPTA parashikon fituesin e Champions League për këtë sezon

Ka përfunduar faza çerekfinale e Champions League për sezonin 2026, duke vulosur katër skuadrat që do të luftojnë për një vend në finalen e kompeticionit më prestigjioz për klube në Europë.

Në mesin e gjysmëfinalistëve janë kampionët në fuqi Paris Saint-Germain, gjiganti gjerman Bayern Munich, anglezët e Arsenal dhe spanjollët e Atlético Madrid.

Shorti ka rezervuar dy përballje të forta: Paris Saint-Germain do të sfidojë Bayern Munich, ndërsa Atlético Madrid përballet me Arsenal, në një duel të hapur për dy biletat e finales.

Ndërkohë, rrjeti i specializuar për statistika Opta ka publikuar parashikimet për këtë fazë, bazuar në një superkompjuter që ka analizuar të dhënat e skuadrave dhe ka simuluar 10 mijë skenarë të mundshëm deri në përfundim të turneut.

Sipas këtyre projeksioneve, Arsenal konsiderohet favoriti kryesor për të fituar trofeun, me një probabilitet prej 36.75%. Pas tij renditet Bayern Munich me 34.61%, ndërsa Paris Saint-Germain ka 19.35% shanse për triumf. Në vendin e fundit sipas parashikimeve qëndron Atlético Madrid me 9.29%.