Osimhen i hap derën Juventusit: Është një nga klubet që do të doja të luaja!

Victor Osimhen ka folur në konferencë për shtyp në prag të përballjes së Champions League kundër Juventus, duke theksuar rëndësinë e madhe të sfidës dhe objektivin e skuadrës së tij për të marrë fitoren. Sulmuesi nigerian u shpreh se ndeshja e së nesërmes është vendimtare dhe se ekipi është i vetëdijshëm për forcën e kundërshtarit.

“E dimë që do të luajmë kundër Juventusit, një skuadër shumë e fortë me lojtarë cilësorë. Nuk duam ta nënvlerësojmë, por kemi futbollistë me eksperiencë për ta përballuar këtë sfidë. Jemi gati dhe duam të luajmë si në ndeshjen e parë. Nuk do të jetë e lehtë, sidomos për ta, por ne duam fitoren”, deklaroi Osimhen.

Ai komentoi edhe zërat për një transferim të mundshëm në Torino në të ardhmen. Osimhen e cilësoi Juventusin si një nga klubet më të rëndësishme në botë, ku kanë luajtur shumë legjenda.

“Kur kam dëgjuar për interesimin, kam qenë i entuziazmuar për të ardhur. Fatkeqësisht, transferimi nuk u realizua. Jam i lumtur këtu ku jam tani, por në të ardhmen nuk i dihet kurrë. Juventusi mund të jetë një nga klubet ku do të doja të luaja”, përfundoi ai.