Parma penalizohet me 2 pikë, në Palermo Juve synon +14, Milan në krizë

Sporti E Hënë, 19 Prill 2021 01:58

Nëse Juventus mund të quhet kampione, edhe pse jo matematikisht në Seria A, një tjetër skaudër, Parma, konsiderohet thuajse e rënë në një kategori më poshtë. Nuk kanë të sosur telashet për klubin e Parmës dhe sikur të mos mjaftonte vendi i fundit në klasifikimin e Serisë A, apo edhe problemet e shumta administrative, në pjesën e mbetur të këtij sezoni skuadra emiliane ka marrë një tjetër goditje këtë herë nga gjykata sportive e Federatës Italiane të Futbollit. Parma dënohet me -2 pikë në klasifikim për mos-shlyerjen e detyrimeve ndaj futbollistëve të saj dhe duke shtuar këtu edhe pikën që i është hequr verdhebluve përpara disa muajve shkon në tre numri i pikëve që i janë zbritur Parmës në këtë sezon. Me këtë dënim të marrë pakësohen akoma edhe më shumë shanset që formacioni emilian të luajë në Serinë A edhe sezonin e ardhshëm pasi Parma tashmë ka zbritur në kuotën e 9 pikëve. Pavarësisht se ka edhe dy ndeshje më tepër për të zhvilluar diferenca mes saj dhe Atalantës, që është skuadra e fundit që siguron mbijetesën shkon në – 15 pikë. Por gjykata sportive nuk ka dënuar vetëm skuadrën e Parmës me heqjen e dy pikëve nga renditja e përgjithshme por edhe ish presidentin e klubit emilian Tommaso Ghirardi dhe drejtorin sportiv Pietro Leonardi nga 4 muaj secilin me masën e sigurisë “arrest shtëpie”.

Juventus

Një fitore e mundshme në Palermo do të shkëpuste Juventus plot 14 pikë nga vendi i dytë që mbahet nga Roma. Bardhezinjtë e Antonio Contes janë të fokusuar më tepër nga ndeshja e Champions League ndaj Borusis së Dortmundit, ndaj së cilës do të luajnë në mesjavë. Në ndeshjen e parë Juve fitoi 2-1 duke e lënë të hapur kualifikimin ndërsa në Seria A duket se diferenca e krijuar karshi Romës i bën të qetë bardhezinjtë të cilët në Palermo kërkojnë thjesht të mbyllin sa më shpejt llogaritë matematikore me titullin e katërt radhazi kampion.

Milan

Fatet e trajnerit Pipo Inzaghi mund të varen nga Firence. Të djelën Milan luan në transfertë ndaj Fiorentinës dhe për Pipo Inzaghin, ka kohë që bie “kambana e alarmit”. Barazimi me Veronën në ndeshjen e fundit konfirmon krizën e Milan, që ka dalë thuajse nga objektivat. Inzaghi në rast humbje nuk mund të presë më përfundimin e sezonit, pasi skuadrës së tij mund t’i rrezikohet rënia në një kategori më poshtë. Presidenti Berlusconi ka menduar edhe për pasardhësin e Inzaghit, por mbetet për t’u zbuluar pasi mediat italiane kanë spekuluar deri tani me shumë emra të ndryshëm trajnerësh.

Seria A – Java e 27-të

14 mars

18:00 Palermo – Juventus

20:45 Cagliari – Empoli

15 mars

15:00 Atalanta -Udinese

15:00 Genoa – Chievo

15:00 Sassuolo -Parma

18:00 Verona – Napoli

20:45 Inter -Cesena

16 mars

19:00 Fiorentina – Milan