Pas humbjes së Milanit, agjenti i Allegrit: “Max nuk synoi Scudetto-n. Leao, kontribut i ulët këtë vit”

Humbja e Milanit ndaj Lazios në Olimpico ka lënë pasoja të rënda në ambientin kuqezi, i cili pas derbit kishte filluar të shpresonte. Trajneri Allegri është vënë në shënjestër të kritikave për disa zgjedhje taktike dhe të lojtarëve, megjithëse duhet theksuar se ai nuk e ka përdorur kurrë fjalën “Scudetto” pa vend. Përkundrazi, mesazhi i tij ka qenë gjithmonë i balancuar dhe realist, duke mos synuar kurrë titullin kampion.

Giovanni Branchini, agjenti i Max Allegrit, deklaroi në “Radio anch’io sport” se trajneri nuk ka menduar kurrë për fitoren e Scudettos dhe nuk ka synuar kurrë të garojë me Interin. Ai ka theksuar vazhdimisht rëndësinë e kualifikimit në Champions League si objektiv kryesor. Branchini shtoi se kjo qasje nuk ishte një strategji, por një shprehje e realizmit dhe korrektësisë nga ana e Allegrit.

Lidhur me menaxhimin e Rafael Leaos, Branchini theksoi se dinamikat e klubit janë komplekse dhe Leao është një aset i rëndësishëm. Ai pranoi se kontributi i lojtarit këtë vit nuk ka qenë i madh, duke e cilësuar si “kështu-kështu” dhe të dukshëm për të gjithë. Megjithatë, Leao mbetet një lojtar kyç dhe duhet mbrojtur deri në fund, ashtu siç bëri Allegri pas ndeshjes, pavarësisht zëvendësimit të tij të papritur.

Marrë nga La Gazzetta dello Sport