Pep Guardiola konfirmon largimin nga Manchester City

Thashethemet u bënë realitet: epoka e Pep Guardiolës në Manchester City ka marrë fund. Dhjetë vjet pas ardhjes së tij në vitin 2016, dhe me një koleksion prej 20 trofesh, Pep i thotë lamtumirë projektit të tij më jetëgjatë si trajner. Ai largohet një vit para përfundimit të kontratës së tij, e cila do të skadonte më 30 qershor 2027. Kjo ndodh pasi skuadra fitoi FA Cup dhe Kupën e Ligës këtë sezon, por humbi titullin e Premier League ndaj Arsenalit të Mikel Artetës, në një duel të ashpër deri në javën e parafundit të kampionatit.

Pavarësisht humbjes së Premier League, tifozët e City-t i kërkuan Guardiolës të qëndronte, duke brohoritur “Edhe një vit, edhe një vit, Guardiola!” pas ndeshjes në Bournemouth. Megjithatë, vendimi ishte marrë dhe rrugët do të ndaheshin. Trajneri nga Santpedor largohet pasi ka transformuar futbollin. Në 592 ndeshje që ka drejtuar City-n, ai ka grumbulluar 20 tituj. Këtu përfshihen gjashtë tituj të Premier League (2017–18, 2018–19, 2020–21, 2021–22, 2022–23 dhe 2023–24), tre Kupa FA (2018-19, 2022-23 dhe 2025-26), pesë Kupa të Ligës (2017-18, 2018-19, 2019-20, 2020-21 dhe 2025-26), tre Superkupa Angleze (2018, 2019 dhe 2024), një Superkupë Evrope (2023), një Botëror Klubesh (2023), dhe ka udhëhequr “sky blues” drejt fitores së Champions League-s së parë në historinë e tyre (2022-23).

E ardhmja e tij tani mbetet e paqartë, megjithëse ka shumë thashetheme që e lidhin atë me ndonjë kombëtare të nivelit të lartë. Italia, për shembull, është një emër që qarkullon.

Ndërkohë, zëvendësuesi i tij është tashmë i vendosur. Është një “i njohur i vjetër”: Enzo Maresca. Italiani do të rikthehet në klubin e Etihad, ku ka punuar më parë në nivelin e akademisë dhe si asistent i vetë Guardiolës, duke qenë pjesë e stafit të tij në sezonin kur City fitoi Champions League. Pas atij suksesi, Maresca thelloi karrierën e tij si trajner i pavarur (më parë nuk i kishte shkuar mirë te Parma) dhe ngjiti Leicester City-n në Premier League, si dhe e bëri Chelsea-n kampion të Conference League dhe Botërorit të Klubeve.

Marrë nga Marca Premier