Piastri triumfon në Bahrein, Ferrari sërish jashtë podiumit
Oscar Piastri shkëlqeu në pistën e Bahreinit, duke i dhuruar McLaren-it fitoren e parë historike në këtë Çmim të Madh dhe njëkohësisht suksesin e tij të dytë sezonal në Formula 1. Piloti australian dominoi nga fillimi në fund, pasi e nisi garën nga “pole position” dhe nuk e lëshoi për asnjë moment kreun.
Pas tij, u rendit britaniku George Russell me Mercedes, i cili siguroi vendin e dytë pas një dueli spektakolar me Lando Norrisin e McLaren, që u ngjit në podium në vendin e tretë. Një përballje e fortë mes dy britanikëve që vazhdoi deri në vijën e finishit.
Makina Ferrari u desh të kënaqej sërish me pozicionet jashtë podiumit. Charles Leclerc dhe Lewis Hamilton përfunduan përkatësisht në vendin e katërt dhe të pestë, pavarësisht një strategjie ndryshe nga skuadra italiane, e cila nuk dha rezultatet e shpresuara.
Një ditë për t’u harruar për Max Verstappen me Red Bull, që u klasifikua vetëm i gjashti. Piloti holandez pati probleme gjatë ndalesave në bokse dhe madje në një moment të garës ndodhej në fund të renditjes, duke mos qenë asnjëherë pretendent real për fitoren.
Zona e pikëve u plotësua me Pierre Gasly (vendi 7), Esteban Ocon (8), Yuki Tsunoda (9) dhe debutuesin Oliver Bearman në vendin e 10-të, që mbylli me sukses një garë të veçantë për McLaren në Bahrein.
