Premier League/ Liverpooli fiton ndaj West Ham dhe i afrohet titullit, ndalet Chelsea

Liverpool vijon rrugën drejt titullit, duke fituar 2-1 ndaj West Ham. Luis Diaz zhbllokoi sfidën në minutën e 18-të, por një autogol i Robertson në minutën e 86-të solli ankth te vendasit. Megjithatë, Van Dijk shënoi golin e fitores në minutën e 89-të, duke siguruar tre pikë të arta për “The Reds”, që tashmë janë gjithnjë e më pranë titullit.

Në “Stamford Bridge”, Chelsea zhgënjeu sërish, duke barazuar 2-2 ndaj Ipswich, në një takim që nisi në mënyrën më të keqe për “Blutë”. Të besuarit e Enzo Maresca-s e panë veten në disavantazh që në pjesën e parë, me golat e Enciso (19’) dhe Johnson (31’).

Reagimi i vendasve erdhi vetëm pas pushimit, kur një autogol nga Tuanzebe dhe më pas goli i Jadon Sanchos në minutën e 80-të, rikthyen baraspeshën. Pavarësisht presionit në fund, rezultati nuk ndryshoi dhe Chelsea humbet pikë të rëndësishme në garën për zonën Champions, duke mbetur në vendin e pestë me 54 pikë.

Spektakël në sfidën tjetër të drekës, ku Wolves mposhti Tottenham-in me rezultatin 4-2 në një ndeshje me ritëm të lartë dhe gola.