Presidenti i Interit jep dritën jeshile për transferimin e talentit të Brescias

Presidenti i Brescias, Massimo Cellino, pak ditë më parë “hapi ankandin” për “xhevahirin” e skuadrës së tij, Tonali. Ai paralajmëroi se do të këtë një derbi të Italisë, mes Juventusit dhe Interit, për të siguruar shërbimet e futbollistit 19-vjeçar.

Trajneri i zikaltërve, Antonio Conte, nuk dëshiron ta humbasë talentin italian, pasi sezonin e kaluar arriti që të merrte Barella-n dhe Sensin. Ashtu siç veproi me Andrea Pirlon në fund të viteve ’90 ish-presidenti i Interit, Massimo Moratti, të njëjtën gjë kërkon të bëjë sot Steven Zhang, i cili është gati “të hapë thesin” për mesfushorin më premtues të Italisë.

Për mesfushorin do të duhet një shifër rreh 50 milionë euro, të cilat presidenti i Interit është i gatshëm që t’i investojë. Nga ana e tij, Tonali mësohet se preferon Interin para Juventusit, pasi beson se nën urdhrat e Antonio Conte do të ketë më shumë hapësira në formacion.