PSG e detyruar të luajë sfidat e kthimit në Champions në transfertë, ja arsyeja

Edhe pse Paris Saint-Germain ka ngritur trofeun e Champions League vetëm disa muaj më parë, rrugëtimi drejt mbrojtjes së titullit duket i vështirë dhe i mbushur me sfida. Kampionët e Luis Enrique përballen me një fazë eliminatore të ndërlikuar, ku çdo ndeshje do t’i testojë në maksimum.

PSG ka rënë në pjesën më të komplikuar të tabelës, ku do të përballet me Chelsea-n në 1/8-at e finales. Nëse parizienët do të kalojnë këtë pengesë, çerekfinalet mund t’i rezervojnë përballjen me Liverpoolin, ndërsa në gjysmëfinale ata mund të gjejnë përballë një mes Real Madridit, Bayern Munich ose Manchester City. Rivalë të frikshëm që do të detyrojnë skuadrën e Luis Enrique të japë maksimumin për të mbrojtur titullin europian.

Një sfidë shtesë për PSG është vendimi i ri i UEFA-s, i cili përcakton që skuadrat që përfunduan në vendet e treta dhe të katërta në fazën e grupeve do të luajnë gjithmonë ndeshjen e kthimit jashtë fushe, duke i detyruar kampionët aktualë të nisin çdo duel në “Parc des Princes” dhe të luajnë kthimin jashtë.

Ky ndryshim vjen si pasojë e rezultateve të dobëta të PSG-së në fazën e grupeve, ku ata u renditën vetëm në vendin e 11-të, dhe është pjesë e rregullave të reja të Champions League që kanë hyrë në fuqi këtë sezon.

Kjo gjë do të bëjë më të vështirë mundësinë për një “bis” europian, pasi skuadra e Parisit do të duhet të fitojë jashtë fushe kundër ekipeve më të forta të kontinentit. Finalja e këtij sezoni do të luhet më 20 maj 2026 në Budapest, ndërsa rruga drejt saj duket më e komplikuar se kurrë për klubin francez.