PSG i bën një ofertë “faraonike” Sergio Ramos-it

Sergio Ramos me shumë mundësi nuk do të rinovojë kontratën që skadon më 30 qershorin e vitit të ardhshëm me Real Madridin. Sipas prestigjiozes spanjolle “AS”, për 34-vjeçarin ka interes konkret nga Paris Saint Germain, që është gati t’i ofrojë kontratë 3-vjeçare, nga e cila vetë futbollisti do të përfitonte 20 milionë euro në sezon.

Ky propozim, nëse materializohet, do të ishte joshës për Ramosin, pasi në moshën 34-vjeçare do të nënshkruante kontratën e fundit, por “faraonike”, të karrierës së tij, duke u bërë pjesë e një tjetër klubi të madh.

Në fakt, prioriteti i mbrojtësit andaluzian është që të vazhdojë në Madrid, por në kampin e “Los Blancos” është në fuqi prej një kohe të gjatë një rregull, që nuk lejon nënshkrimin më shumë se për një vit me futbollistët mbi 30-vjeç. Në rastin e Ramosit, klubi mbretëror dëshiron t’i ofrojë atij kontratë 1+1, me rrezikun që marrëveshja të prishet në sezonin e dytë. Ramos dëshiron që të jenë sezone të sigurta.